Gözəlim, sevgilim, əziz həmdəmim,

Evimizi basmış qəmim-kədərim.

Sənin səs-küyünə həsrət qalmışam,

Gəmisi batmıştək fikrə dalmışam.

Zəncirlə bağlanan eşqimiz möhkəm,

Sınaqdan çıxıbsan olsan da ötkəm.

Nə qədər şirindir birgə həyatım,

Bütün arzulara səninlə çatım.

Sən masa üstündə doğranan zaman,

Böyük yaradandan istədim aman.

Dedim oğul toyu nübar dərəsən,

Nəvənlə əylənib xoş gün görəsən

Qocalaq, birlikdə sağlam gün sürək,

Nəvə-nəticənin toyunu görək.

Bu ülvi arzular tale qisməti,

Nə ağırmış ayrılığın həsrəti.

Ayrılığın tonqalında yanan çox,

Bu həsrəti çəkən bilər görən yox.

On gün mənə on il kimi göründü,

Ağ çiçəyim, ağ dumana büründü.

Şapraq səsin dalğa kimi kükrərdi,

Bəs nə oldu yarpaq kimi titrədi.

Qorxma, gülüm, allah sözü dilimdə,

Nicat yolu yaradanın əlində.

                                  1992