Yarım əsr nə tez belə tamamdır,

Əlli yaşsa söz-söhbətdir, yalandır.

Gözlərində şölələnən atəşi

Eşqimizçün saxla, gülüm, amandır!

Sevənlərə bir timsaldır sevgimiz,

Məhəbbətim billur kimi saf-təmiz.

Eşqimizdir dəryalarda yolçumuz,

Qorxma, gülüm, daşa dəyməz gəmimiz.

Illər ötür, qoy artmasın kədərin,

Arzu ümman, ömür qısa, can şirin.

Od yurdumun tufanlarda sönməyən

Atəşisən ürəyində Bəşirin.

Gözlərimdə gəncliyimin sorağı,

Ürəyimdə eşq odunun çırağı.

Dizlərimdə bütöv elin gücü var,

Barmaqlarım saçlarının darağı!

Xatirələr qocalıqda günahım,

Gəncliyimin arzusunda ha yanım.

Qısqanma sən röyaların səsinə,

Sənsən mənim məhəbbətim, pənahım!

Gözəllərin vəfasını görmüşəm,

Çiçəklərin ən qəşəngin dərmişəm.

Həyatımı taleyinə bağlayıb,

Dünyamızın mənasını bilmişəm.

Qar çiçəklər səpələnsə saçına,

Deyərəm ki, hədiyyəsən bacına.

Yubileyində yaratdığım çələngi,

Bəzək kimi mən qoyaram tacına!

Cavan qıza, ya qonşuya bənd olam,

Ya ötəri, ya da gizli zənd salam.

Tufan qopar, göy gurlayar bir anda,

Bu döyüşdən sevinərəm sağ qalsam.

Həm gəncəli, həm də qarabağlıdır,

Tortu əla, plovu qazmaqlıdır.

Yaşasa da birliyində ruhumun,

Arzuları Nigarıma bağlıdır.

Arzu edək ikiqat artsın yaşın,

Salamat ol, yaxşı işləsin başın.

Xörəyimi bişir sən, namizədlik bəsindir,

Doktorluğu yazmağın birdəfəlik at daşın.

Qibtə edən yaman dillər xar olsun,

Geniş dünya gözlərində dar olsun.

Ülviyyətin sevinc seli içində

Bəşir sənə qoy əbədi yar olsun!

                                               1996