Bu dünyada kimi sevdim,

Kimə verdim həyatımı.

Göz açanda ana gördüm,

Aldım ondan həyatımı.

 

Ayaq tutub dil açanda,

Əzizləndim, sığal gördüm.

Mən atamın qucağında

Fərəhlənib dağa döndüm.

 

Uşaqlığım kənddə keçdi,

Anam gedib taxıl biçdi.

Faşistlərlə döyüşərək

Atam neçə cəbhə keçdi.

                              Sünbül yığıb dən topladım,

                              Həyatıma nicat aldım.

                              İsti çörək qucağımda

                              Mən özümü xoşbəxt sandım.

                              Nə uf dedim, nə ah çəkdim,

                              Ayaqyalın dərsə getdim.

                              "Ana” yazdım, "Vətən” yazdım,

                              Faşistlərə ölüm dedim.

                              Uçuranda "nənəm uç”u

                              Dörd qanadlı yoncaları.

                              Tapan kimi sevinirdim,

                              "Atam gəlir” hey deyirdim.

                               Xəbər gəldi, atan gəlir,

                               Sandım ki, bir qartal gəlir.

                               Bir quş olub dedim uçum,

                               Sıçrayaraq onu qucum.

                               Görən kimi donub qaldım,

                               Suya düşən bir köz oldum.

                               Qoltuğunda iki çəlik

                               Şinelisə dəlik-dəlik.

                               Kədər-sevinc dünyasında,

                               Öz qəlbimin aynasında.

                                Gah sevinib, gah ağladım,

                                O gecəni heç yatmadım.

                                Deyirlər ki, qalib əsgər,

                                On yara da alsa əgər,

                                Qələbədən ilham alır,

                                Yaraları tez sağalır.

                                 Sağalsa da o yaralar,

                                 Qəlpələrin izi qalar.

                                 Silinməyir gözlərimdən

                                 Keçirtdiyim iztirablar.