Mənzilimiz üz-üzə,

Qonşu olsan da bizə.

Nə qədər qaş-göz etdim,

Baxmadın heç bir sözə.

Nəzarətçidir arvad,

Aça bilmirəm qanad.

Belə getsə bu gözəl

Əlimdən çıxar ay-dad!

İnsafın olsun Taya,

Salsana məni saya.

Xanımın aramızda

Olub möhkəm bir qaya.

Ümidimi üzmüşəm,

Neçə ildir dözmüşəm.

Daha tabım qalmayıb

Odlanıb közərmişəm!

Günləri vermə badə,

Düşməsin əldən badə.

Hisslərin coşan zaman

Məni də sal bir yadə!

Tamamdır otuz yaşı,

Gözəlləşir göz-qaşı.

Kolye ollam sinəndə

Neyləyirsən daş-qaşı?!

                   7 yanvar, 1985