Ceyranın yağı olmur!

Göz yaşı yağış olur!

Səksəkəli ürək, baxışlar ürkək,

Qulaq səsdə, ümid ovçu insafına,

              bir də incə ayaqlarına,

                               Ovçuda insaf olmasa,

              hədəfə çatsa

Ürək qəmli,                

            gözlər nəmli

Qulaqda boğuq səs,

             ümidi əbəs

Ayaq itirəcək taqətini,

Ovçu aparacaq qismətini...

Dünyanın işinə bax!

Can alan ovçuya bax!

Mən də ovçuyam!

Göydələnin

yeddinci qatında pusqudayam.

Ayağım altda şəhər,

            bir az da uzaqda Xəzər.

Ürəyim səksəkəli,

            baxışlarım axtarır.

Qulağım zəngdə

Ümidim ceyranın insafına,

Bir də ayaq səslərinə...

Ceyranda insaf olmasa,

hədəfə gəlməsə,

                  ürək qəmli,

                  gözlər nəmli,

Qulaqda çingiltili səs,

                  ümidim əbəs.

Ayaq itirəcək taqətini,

Ceyran aparacaq qismətimi.

Dünyanın işinə bax!

Can alan ceyrana bax!

İndi bildinmi,

Nə üçün arığam?..