Mərdəkanda,

                 çarhovuz qırağında,

Gəzdim sorağında,

                 tapmadım.

Gözlərimi yumub,

               dedim bir az uyuyub,

Yuxumda axtarım.       

Yuxum çəkildi dara,

                gecəni-gündüzə qatıb

Həmin gecə yatmadım.

Xatirələr apardı

                 "Buzovna dənizi” nə.

                  Xəzərdə üzə-üzə,

Gəldim xəyalınla üz-üzə.

Baxdım doyunca

                  min mənalı gözünə.

Həsrət qarışıq

                   bir sevinc bürüdü qəlbimi,

Uzatdım əlimi,

                   əlim çatmadı...

Şəhərə gedib

                    sən açan qapını

                    bir də albomunu açdım.

Çıxdın qarşıma

                     müxtəlif yaşda,

                     məhəbbətin baxışda.

Birində anasan - qayğılı,

                     dalğalı dəniz...

Birində - sevimli yar,qayğısız,

                      sular sakit, ləpəsiz,

Hamsı da mənə əziz.

Məlhəm qoyuldu ağrıma,

Ehtiyac duydum qayğına.

Səni tapıb, arzuma çatıb

Şirin röyalar aləmində

                      doyunca yatdım.

                                                     1972