"Gülüstan”ın qızları,

Sayrışan ulduzları.

Gözəlliyi əvəzsiz,

Qırdı bizi nazları.

Min bir gecə nağılı,

Tamam alır ağılı.

Oyunları artırır

Ürəkdəki ağrını.

Titrədikcə bədənlər,

Boşalır tez badələr.

Gözlərimdə sayrışır

Sinə üstə danələr.

Paltarları yarımçıq,

Sinələr tamam açıq.

Hissimizlə oynayıb

Verirlər bizə acıq!

Tüllər altda xalları,

Reklamdır əndamları.

Ruhumuza qidadır

Alır sevən canları.

Gözəldir bir-birindən,

Ağlım uçur yerindən.

Cavanlıq əldən gedir,

Ah çəkirəm dərindən!