Ürəyim bu günlər hey kədərlənir,

Qəlbim sevinməyir, üzüm gülməyir.

Fikrim dağınıqdır, könlüm pərişan

Qəlbə sevinc verən, ömrə yaraşan

Ürək həmdəmimi tapa bilmirəm.

 

Gözümdə oynaşan, qəlblə çarpışan,

Şirin duyğulardan uzaq olmuşam.

Ruha sevinc verən gözəl yarımı,

Mənə həmdəm olan o dildarımı

Bu gün nədəndisə tapa bilmirəm.

 

Gəlin incitməyin bu qədər məni,

Yarın həsrətilə vuran qəlbimi.

Mənim əzizlərim, inanın ki, mən

Verdiyim vədədən dönən deyiləm,

Ondan başqasını sevən deyiləm!..

 

                                          1959