Ürəyim eşqiylə döyündüyündən,

Bulaq tək qaynayıb daim coşacaq.

Min yerə min tellə bölündüyündən,

Bu gözəl həyata min söz qoşacaq.

Günəşsə eşqdən yarandığından,

Hər zaman alovlar, odlar saçacaq.

Həmişə yüksəkdə dayandığından,

Mayaq tək zülmətə o yol açacaq.

Mən də dayanmışam eşqin yolunda,

Günəş vüqar ilə dayanan kimi.

Od tutub yanaydım yarın qoynunda,

Pərvanə atəşdə şad yanan kimi.

Bilirsən sevgilim, mən çox sevirəm,

Səni, Vətənimi, böyük ölkəmi.

Sənin hər arzuna mən can deyirəm,

Bülbül qızılgülə can deyən kimi.

                                        1958