Bülbül  sevinməsin xoş nəğməsilə,

Xəzər öyünməsin gur nərəsiylə.

Bir nəğmə qoşaram eşq həvəsiylə,

Nizami, Səmədin sənət səsilə.

Bülbül nalə çəkib bir an inləyər,

Xəzərsə inləyib səssiz dinləyər.

Bülbülün nəğməsi, Xəzərin səsi,

Onları susdurar aşiq nəğməsi.

Mən də bir aşiqəm, öz diləyim var,

O, şəhla gözlüyə ürək sözüm var.

Arzudur insana qol-qanad verən,

Sevgidir ömrümə hakim kəsilən.

Həyatsa sevgimlə, arzumdur ancaq,

Bunlarla həyatım çiçək açacaq!

                                               1956