Görərdim  gecəni  gündüz  gözündə

Duyardım  acını  şirin  sözündə

Qışımı  bahara  çevirən  gözəl

Çatmışam  arzuma  eşqin  düzündə 

 

Arzular  çevrilib  indi  qayğıya

Əllərim  uzanıb  günəşə , aya

Ahıllıq  dövrünü  yaşamaq  çətin

Tuşlanıb  ürəyim  iki  dünyaya

 

Biri  qonağımdır , birinə  qonaq

Həyat  ağacında  ikicə  budaq

Budaqlar  arası  oynayan  quştək

Budaqdan – budağa  sevinclə  qonaq

 

Həyat  "ruletka” ya  sanki  bənzəyir

Üzümü  kədərlə  sevinc  bəzəyir

Bir  quş , iki  budaq,  barmaq  tətikdə

Ölümsə  qurbanın  hər  an  gözləyir

 

Gözləyə - gözləyə  çox  şeyi  daddıq

Bu  fani  dünyaya  yaman  aldandıq

Çiynimdə  mələklər  əməllərimlə

Həqiqi  dünyaya  birgə  addayaq

                      

                                                 2003