Şer yaz! Deyərək qəlbimə hökm edirsən,

Şerin ülvi mənasın sən ki, yaxşı bilirsən.

 

Şer – arzudan doğan insan sevinci,

Sevgi işığında parlayan inci.

Şer – insan nisgili, qəlb ağrısı,

Şərbətdən yaranan ürək yanğısı...

Şer – dünyanın tarazlıq yükü,

Düşmən sinəsinə sancılan süngü.

Şer – məhəbbətin zəfər çələngi,

Açılan şəfəqin üfiqdə rəngi.

Şer – bayrağımın ulu amalı,

Türkün nişanəsi, göyün hilalı.

Şer – aşiqlərin odlu baxışı,

Təbiət çaları, xalı naxışı.

Şer – körpələrə ana laylası,

Xocalı yarası, bala naləsi.

Şer – azadlığın uca ələmi,

Ulutürk Təbrizi, süngü-qələmi.

Şer – Nizaminin ulu "Xəmsə”si,

Qarabağ həsrətli şikəstə səsi.

Şer – Xətainin Əli inancı,

Topun lüləsini qıran qılıncı.

Şer – ürəyimdə Araz yarası,

Vətənimin güney-quzey parası.

Şer – Xəzərimin tufan qəzəbi,

Birləşmək həsrəti, Turan əzabı.

 

                                            2000