Qara – qartalın ucalıq nöqtəsi,

Qızlar yanağında gözəllik nəğməsi.

Ömür dünyamızın dəyişən yarısı,

Bolluq əlaməti torpaq çöhrəsi.

 

Qara – qara gözlərin işıq rəmzi,

Türklərin coşmuş "Böyük dənizi”.

İslam dünyasının müqəddəs daşı,

Əsir düşən qız-gəlinlər bənizi.

 

Qara – dağ, yanan yurdun ahı-naləsi,

Xalqımın üstündə düşmən kölgəsi.

Şəhid anaların matəm çarşabı,

Vətən qaçqının yanmış ölkəsi.

 

Göy – yurdun özü, göy aynası "Göygöl”ü,

Altaydan Turanadək çəməni-çölü.

Qaçqın körpələrin don vurmuş dodağı,

El-oba həsrətli azadlıq könlü.

 

Göy – səmanın özü dünya çətiri,

Minarə bəzəyi, quran sətiri.

Güclü atəşlərin yanan işığı,

Türkün təndirində çörək ətiri.

 

Göy – dağ, əynində Altay çaları,

Aralı dağların yaralı bağrı.

Dəi küləklərin tufan qəzəbi,

Coşmuş Xəzərimdə dalğa qatarı.

 

Qara – göy boyalarla ucalan dağım

Azadlıq yolları bir alın yazım

Göylərin sonsuzluğu inanc yerimiz,

Ay – ulduzlu üç rəngli bayrağım

 

                                                     1993