Vətən sözü ürəyimdə, dilimdə,

Nələr olur doğma Təbriz elində.

Mübarizə meydanında düşmənim

Məhv olacaq nifrətimin selində.

 

Savalanın dərdi yaman çoxalıb,

Zirvəsini boran alıb, çən alıb.

At oynadır yadellilər belində,

Dəlidağım, çəmənzarım talanıb.

 

Ah-zarımı çevirmişəm şimşəyə,

Düşmənimi keçirəcəm ilməyə.

İgidlərim, amandı ha, qoymayaq

Azadlığın məşəlini sönməyə!

 

                                                1978